មហាធម្មសង្គហៈ - កងធម៌ពួក ១ - ធម៌១មានឧបការៈច្រើន

ឯកកៈ ធម៌ពួក១

ធម៌១មានឧបការៈច្រើន គឺ :

១- អប្បមាទោ  កុសលេសុ  ធម្មេសុ

សេចក្ដីមិនធ្វេសប្រហែសក្នុងធម៌ទាំងឡាយជាកុសល ។

ធម៌១គួរកំណត់ដឹង គឺ :

១- ផស្សោ  សាសវោ  ឧបាទានិយោ

ផស្សៈប្រកបដោយអាសវៈ ជាទីតាំងនៃឧបាទាន ។

ធម៌១ជាចំណែកនៃសេចក្ដីវិនាស គឺ :

១- អយោនិសោ  មនសិការោ

ការមិនធ្វើទុកក្នុងចិត្ត ដោយឧបាយប្រាជ្ញា ។

(ធម៌នេះហៅថា “ ធម៌ដែលជាចំណែកវិសេស ” ក៏បាន)

ធម៌១ត្រាស់ដឹងបានដោយក្រ គឺ :

១- អនន្តិកោ  ចេតោសមាធិ

ចេតោសមាធិមិនមានចន្លោះ ។

ធម៌១ដែលគួរឲ្យកើតឡើង គឺ :

១- អកុប្បំ  ញាណំ

ញាណដែលមិនកម្រើក គឺបច្ចវេក្ខណញ្ញាណ ។

ធម៌១ដែលគួរដឹងច្បាស់ គឺ :

១- សព្វេ  សត្តា  អាហារដ្ឋិតិកា

ពួកសត្វទាំងពួងតាំងនៅបាន ព្រោះអាហារ ។

ធម៌១ដែលគួរឃើញច្បាស់ គឺ :

១- សព្វេ  សត្តា  សង្ខារដ្ឋិតិកា

សត្វទាំងអស់ឋិតនៅបាន ព្រោះអាស្រ័យសង្ខារ 

ធម៌១ដែលគួរចម្រើន គឺ :

១- កាយគតាសតិ  សាតសហគតា 

កាយគតាសតិដែលប្រកបដោយសេចក្ដីត្រេកអរ      (សេចក្ដីសុខ) ។

ធម៌១ដែលគួរលះបង់ គឺ :

១- អស្មិមានោ

អស្មិមានះ គឺសេចក្ដីប្រកាន់ខ្លួន 

ធម៌១ដែលគួរធ្វើឲ្យជាក់ច្បាស់ គឺ :

១- អកុប្បា  ចេតោវិមុត្តិ

ការរួចចាកកិលេស ដោយអំណាចចិត្តមិនកម្រើក